ნიუ იორკის სასამართლომ ცნობილ ქართველ სპორცმენს 10 წლით პატიმრობა მიუსაჯა

3253

ავთანდილ ხურციძეს ნიუ იორკის სასამართლომ 10 წლით პატიმრობა მიუსაჯა, – ამის შესახებ პირველი არხის კორესპონდენტი ნიუ იორკიდან იუწყება.

ქართველი მოკრივის სასჯელის ზომა ნიუ იორკის ფედერალური სასამართლოს მოსამართლემ რამდენიმე წუთის წინ გამოაცხადა.„მივდივარ ციხეში” – ამ სიტყვებით დატოვა მსჯავრდებულმა სასამართლო დარბაზი.

შეგახსენებთ, ავთანდილ ხურციძე 2017 წლის 8 ივნისს ამერიკის შეერთებულ შტატებში ჩატარებული მასშტაბური სპეცოპერაციისას დააკავეს. სპეცოპერაციისას დაკავებულ 33 პირს შორის 15 წარმოშობით ქართველი იყო. დაკავებულებს ამერიკის იუსტიციის სამინისტრო საბჭოთა კრიმინალურ დაჯგუფებად – „შულაია ენთერფრაიზად“ მოიხსენიებდა.

ჯგუფის წევრებს გამოძიებამ მძიმე ბრალდებები წაუყენა, მათ შორის კონტრაბანდა, რეკეტი, არალეგალური აზარტული თამაშები, ფულის გამოძალვა, თაღლითობა, ფინანსური მაქინაციები. ე.წ. შულაია ენთერფრაიზის დაჯგუფების ლიდერად გამომძიებლებმა ქართული წარმოშობის რუსეთის მოქალაქე, 40 წლის რაჟდენ შულაია დაასახელეს. 37 წლის ავთანდილ ხურციძე კი, მეტსახელად „ჩაქუჩა“ საბრალდებო მასალების მიხედვით რუსული მაფიის ბოსის – რაჟდენ შულაიას „კუნთი“ იყო ბრუკლინში.

შულაია და ხურციძე ნიუ იორკის ფედერალურმა სასამართლომ მიმდინარე წლის ივნისში ერთად გაასამართლა. ნაფიცმა მსაჯულებმა შულაიას მსგავსად, (რომელიც რუსეთის მოქალაქეა) დამნაშავედ საქართველოს მოქალაქე, მოკრივე ავთანდილ ხურციძეც ცნეს.