იტალიაში მიგრანტის მკვლელობის გამო აქციები მესამე დღეა არ წყდება

0
1429

იტალიის ქალაქ მაჩერატაში რასიზმის საწინააღმდეგო აქცია მესამე დღეა, იმართება. ასობით მოქალაქე ეთნიკურ ნიადაგზე ჩადენილ მკვლელობას აპროტესტებს.

აქციის ორგანიზატორმა ფრანჩესკო პიობიჩმა რამდენიმე საათის წინ იტალიურ მედიასთან ინტერვიუში განაცხადა, რომ ეს მანიფესტაცია არის გაფრთხილება ყველა იმ ადამიანის მისამართით, ვინც რელიგიური და ეთნიკური ნიშნით მოქალაქეების დისკრიმინაციას ახდენს.

ერთი კვირის წინ ქალაქ მაჩერატაში 28 წლის იტალიელი მამაკაცი, ლუკა ტრაინი რამდენიმე ნიგერიელ მიგრანტს თავს დაესხა. ერთ-ერთი მათგანი ცეცხლსასროლი იარაღით მოკლა, 6 კი დაჭრა.

ტრაინი დაკავებულია. მას ბრალი უკვე წაუყენეს. პოლიციის ინფორმაციით, მკვლელობა ბრალდებულმა ეთნიკურ ნიადაგზე ჩაიდინა. ტრაინი სეპარატისტული, ულტრამემარჯვენე პარტია „ჩრდილოეთის ლიგის“ წევრია.